الأحد، 28 أبريل 2013
الاثنين، 15 أبريل 2013
فض اعتصام سائقى النقل العام "طنطا"
اللى حصل امبارح عند مبنى المديرية
كنت قاعد مع الشباب فى حزب الدستور و سمعنا ان انضرب غاز على اعتصام سواقين النقل قدام المحافظة فنزلنا نشوف فيه ايه و اول ما وصلنا عند المحافظة لقينا تشكيلات امن و الغاز كان خفيف جدا و كانت الداخلية بدأت تفض اعتصام السواقين و بياخدو ناس منهم
كان فيه كزا حد بيتشد و فيه واحد كان حواليه كزا حد و انضرب بالاقلام فطلعت الموبايل اصور زى كل مرة بننزل بنصور عشان نوثق الاحداث
و انا واقف بصور فجأة لقيت واحد بزى ملكى جاى عليا و راح شادد الموبايل منى و ماسكنى من شعرى و لوى دراعى وودانى لمدير الامن قالهم دخلوه جوا و كان قبلها فيه حوالى 7 رمونى فى وسطهم و فضلو يضربونى بالاقلام و الشلاليط
و انا بتزق شوفت اتنين من صحابى "احمد زايد" حزب الدستور و "احمد فنون" حزب مصر القوية بينضربوا عشان حاولو يشدونى منهم و بعديها مشوفتش حد من صحابى لحد و انا طالع
و احنا طالعين على السلم كان فيه مجند امن مركزى ماشى ورانا و بيقول "والنبى يا باشا عايز اضربه قلم واحد" و كأنها حاجة مسلية اوى
طلعنا فوق و دخلونى مع السواقين اللى كانو اتمسكو
السواقين كانو حوالى 14 واحد منهم واحد كبير فى السن حوالى 60 سنة دة طلع لان سنه كبير وواحد كمان 55 سنة دة كان عامل عملية و لما الغاز انضرب اغمى عليه و زمايله شالوه فاتقبض عليه هو و اللى شايلينه
بعدها بشوية جيه طالب ثانوى كان معدى وواحد كان رايح يشترى هدوم اتمسك وهو معدى و "ناصر الناصرى" ناشط من طنطا كان معموله ضبط واحضار فى قضية تظاهر
جيه اتنين ظباط واحد منهم كان كل ما يكلم واحد كلمة لازم يلحقها بشتيمة بالام و سب دين
لما عرفو ان ناصر هو اللى كان معموله ضبط و احضار خدوه على اوضة لوحده و انضرب جامد و الباب مقفول عليهم
دخلنا عند مدير الامن و ناس معاه وواحنا بنتكلم بصلى و قالى "انت بقى سيكو" (سيكو دة اسم الاكونت بتاعى على الفيس)
قالى انت كنت بتصور ليه قولتله عادى زى اى حاجة بتحصل بنصورها يا فندم قالى و انت مالك انت بالسواقين
كان فيه معانا حسن شلبى مصور المصرى اليوم قعدو يقولوله انت المصور الخاص بخالد الدويك بقا و الاولتراس و كدة و انت ايه اللى جابك و كلام من النوعية دى
حسن جيه مكالمة بخصوصه و مشوه بعد ما اخد حاجته و انا و طالب الثانوى دة قالو هيكشفو عننا لو مفيش حاجة هيطلعونا
و انا طالع عرفت ان الشباب بتوع طنطا واقفين تحت عشاننا و فيه عدد كبير و شوفت "د/احمد بيومى" امين حزب الدستور بالغربية و "هشام هاشم" محامى و شوفت باقى الشباب اللى اتقبض عليهم
بعدها بشوية طلعونا بعد ما ادونا الموبايلات و مسحو الفيديوهات اللى كنت مصورها
مش عارف احنا هنفضل فى كدة لحد امتى و امتى هنبقى فى بلد بتحترم الحرية و حقى كانسان انى منضربش و حقى فى التعبير عن رأيى
احنا مش ابطال ولا عايزين نبقى ابطال ولا عايزين حد يعرفنا
كل اللى بنحلم بيه من اول الثورة و من قبلها اننا نعيش فى وطن بيحترمنا و بيحترم انسانيتنا
السواقين اللى اتقبض عليهم فيهم ناس بقالها 20 سنة بتشتغل و مش متثبتين و بياخدو حوالى 250 جنيه فى الشهر
الاشتراك في:
التعليقات (Atom)